Katër astronautë u kthyen në Tokë të enjten, duke u ulur në Oqeanin Paqësor pranë San Diegos pasi u larguan më herët nga sa ishte planifikuar nga Stacioni Ndërkombëtar Hapësinor. Katër astronautët, që udhëtonin në një kapsulë të SpaceX Creë Dragon, duhet të ktheheshin muajin tjetër pasi mbërriti një ekuipazh zëvendësues. Por një problem mjekësor me njërin prej tyre javën e kaluar e shtyu NASA-n të vendoste t'i kthente anëtarët e ekuipazhit në shtëpi më herët. Zyrtarët e NASA-s e quajtën atë një "evakuim të kontrolluar mjekësor", hera e parë në 25 vjet që një astronaut largohej nga Stacioni Hapësinor ndërkombëtar për një arsye mjekësore. Kapsula kozmike zbriti me parashutë, duke rënë në ujërat e qeta të Paqësorit pranë San Diegos në orën 3:41 të mëngjesit sipas orës lokale. Kapsula u nxorr nga deti dhe u vendos në kuvertën e një anijeje rikuperimi të SpaceX dhe kapaku i saj u hap më pas, me astronautët që dolën që andej pak para orës 4:30 të mëngjesit. Katër astronautët e kthyer janë Zena Cardman dhe Michael Fincke të NASA-s; Kimiya Yui e agjencisë japoneze hapësinore; dhe Oleg Platonov i agjencisë ruse hapësinore. Ata qëndruan për 167 ditë në hapësirë në këtë mision.