Kandidati nacionalist opozitar, Karol Naërocki, ka fituar raundin e dytë të zgjedhjeve presidenciale në Poloni me 50.89 për qind të votave, sipas komisionit të zgjedhjeve, duke i dhënë një goditje agjendës reformuese të qeverisë proevropiane të Polonisë. Rivali i tij, Rafal Trzaskoëski, kryebashkiaku liberal i Varshavës dhe aleat i qeverisë së udhëhequr nga Donald Tusk, mori 49.11 për qind të votave, raporton Reuters. Një ‘exit poll’, të dielën, kishte parashikuar Trzaskoëskin fitues. Naërocki, 42-vjeçar, historian euroskeptik, i cili ka udhëhequr një institut përkujtimor, ka bërë fushatë duke premtuar se do të sigurohej që politikat ekonomike dhe sociale do të favorizonin polakët kundrejt nacionaliteteve të tjera, përfshirë refugjatët nga Ukraina fqinje. Boksieri amator fitoi pavarësisht se e kaluara e tij dominoi ditët e fundit të fushatës presidenciale, që nga pyetjet për blerjen e një banese nga një pensionist, e deri te pranimi se ai kishte marrë pjesë në përleshje të orkestruara. Ndërsa Parlamenti i Polonisë ka më shumë pushtet, presidenti mund të vendosë veton për ligjet, ndërkohë që votimi u ndoq me interes në Ukrainë, si dhe në Rusi, SHBA dhe Bashkimin Evropian. Naërocki, i mbështetur nga partia Ligj dhe Drejtësi (PiS), pritet të vazhdojë politikat e paraardhësit të tij, presidentit Andrzej Duda, po ashtu aleat i partisë më të madhe opozitare, përfshirë bllokimin e çfarëdo përpjekjeje nga qeveria për të lejuar abortin apo për reformimin e gjyqësorit.