Europol konfirmon për Top News se mes 2.3 milionë mesazheve që ka arritur të sigurojë nga komunikimet në aplikacionin Matrix flitet edhe shqip. Agjencia policore europiane thotë se shqipja është ndër gjuhët e përdorura në këtë aplikacion, por nuk jep më shumë detaje mbi përmasat e komunikimeve të realizuara në gjuhën shqipe. Europol deklaron se ka ndarë të dhënat me autoritetet ligjzbatuese në Francë, Holandë, Spanjë, Itali dhe Lituani dhe është në tagrin e këtyre vendeve që për llogari të hetimeve që kanë nisur në kuadër të operacionit Matrix të vendosin nëse duan të ndajnë përgjimet e siguruara me shtete të tjera, ose jo. Matrix, sipas Europol, përdorej nga grupet kriminale për të drejtuar aktivitetet e tyre, kryesisht të trafikut të kokainës nga Amerika Latine. Për herë të parë, ky aplikacion u bë i famshëm në Shqipëri në vitin 2022, kur i penduari i drejtësisë, Nuredin Dumani tha se kishte komunikuar me Suel Çelën në Matrix për vrasjen e një administratori të një shkolle private në Tiranë.