Në Ditën e Europës, ish ministrja e punëve të jashtme, Elisa Spriopali përcolli mesazhe për mënyrën sesi duhet të funksionojë pushteti dhe shteti që aspiron t’i bashkohet tryezës së familjes europiane. Shkrimin, Spiropali e shoqëroi me një fotografi të saj duke shtrënguar duart me përfaqësuesen e lartë të Bashkimit Europian, Kaja Kallas të shkrepur gjatë kohës kur ishte pjesë e kabinetit qeveritar. “Europa për ne nuk është një mal me letra, një pirg me dokumenta. Europa për ne është pjesë e një bote ku pushteti kufizohet nga ligji, ku dinjiteti i njeriut vlen më shumë se forca dhe ku shteti nuk është pronë e askujt. Rruga europiane e Shqipërisë nuk është vetëm proces negociatash. Është proces qytetërimi. Dhe po, kjo rrugë ka qenë e gjatë, shpesh e padrejtë, shpesh zhgënjyese. Por është ende rruga më e rëndësishme, dhe e vetme, që kemi zgjedhur. Ky është mesazhi i radhës i Spiropalit, që vjen në vazhdën e një serie kritikash të vazhdueshme lidhur me modelin e lidershipit të krijuar, ku debati sipas saj është i cunguar. Në mbledhjen e fundit të zgjeruar mes qeverisë dhe grupit parlamentar, Rama e paralajmëroi se nëse këto kritika vijojnë, mund të përballet me përjashtimin nga grupi. Deri tani nuk është ndërmarrë asnjë masë e tillë, dhe ish ministrja shfaqet e vendosur të shpalosë të gjithë kritikat që ka për demokracinë në vend.