Dy avionë luftarakë gjermanë Eurofighter u ngritën në fluturim të dielën për të gjurmuar dhe dëbuar një avion ushtarak rus mbi Detin Baltik, ndërsa Estonia tha se do të thërriste një takim urgjent të këshillit të sigurisë të OKB-së pasi avionët rusë shkelën hapësirën e saj ajrore. Forcat ajrore gjermane thanë se avioni rus i zbulimit Il-20M kishte fikur transponderët e tij dhe kishte injoruar kërkesat për të kontaktuar me kontrollorët. Eurofighter-sat u ngritën nga baza ajrore Rostock-Laage për të ndjekur avionin rus ndërsa ai fluturonte në hapësirën ajrore ndërkombëtare. Tensionet mes NATO-s dhe Rusisë janë rritur ndjeshëm pas një serie aktesh që qeveritë evropiane i quajnë të qëllimshme dhe provokuese, nga Kremlini. Të premten, tre avionë luftarakë rusë MiG-31 shkelën hapësirën ajrore estoneze në Gjirin e Finlandës. Moska e mohon këtë. I pyetur nëse SHBA-të ishin të gatshme të mbronin vendet e BE-së nga agresioni i mëtejshëm rus, Donald Trump tha të dielën: "Po, do ta bëja". Më parë, presidenti amerikan kishte thënë se "nuk i pëlqente" inkursioni ajror i Rusisë, por edhe se nuk ishte informuar për të. Estonia dënoi sjelljen "e paturpshme" të Kremlinit. Ajo tha se po thërriste një takim urgjent të këshillit të sigurisë për herë të parë në 34 vjet anëtarësim të Estonisë në OKB. Udhëheqësit botërorë po mblidhen këtë javë në Nju Jork për asamblenë e përgjithshme të OKB-së. Talini - një mbështetës i vendosur i Ukrainës - ka kërkuar konsultime sipas nenit katër të NATO-s, i cili u lejon anëtarëve të takohen me aleatët nëse siguria e tyre kërcënohet. Javën e kaluar, ministri i jashtëm i Polonisë, Radek Sikorski, tha se Moska po testonte reagimet e NATO-s me hapa armiqësorë "gradualë" që cojnë në një konflikt në shkallë të plotë. Komentet e tij në një konferencë sigurie në Kiev erdhën pasi 19 dronë rusë u ulën në territorin polak.