“Shqipëria ka marrë notë pozitive në hapat e ndërmarra prej saj në rrugën e integrimit në Bashkimin Europian megjithatë ka ende shumë detyra që duhen të përmbushen nga ana e qeverisë shqiptare. Europdeputetja Anna Strolenberg rrëfen se një ndër pikat më të rëndësishme është forcimi i opozitës si gurthemel për një demokraci të shëndetshme.” “Dëshira jonë më e madhe është që Shqipëria të bëhet pjesë e BE-së. Sa më shpejt, sepse me të vërtetë mendojmë që Shqipëria është pothuajse tashmë pjesë e BE-së, por duhet të ndërmerren hapat e ardhshëm. Disa gjëra të mira kanë filluar. Për shembull, kanë nisur bisedimet për sundimin e ligjit në kuadër të procesit të anëtarësimit në BE, dhe janë bërë disa reforma në sistemin gjyqësor. Tani kemi strukturën e posaçme kundër korrupsionit dhe krimit të organizuar, por ky është vetëm fillimi.” Eurodeputetja u ndal tek protesta e Partisë Demokratike në Parlamentin Europian dhe tek masa e sigurisë ‘arrest shtëpie’ për ish kryeministrin Sali Berisha. “Po, kam dëgjuar që ai është arrestuar, dhe mendoj që nëse struktura kundër korrupsionit ka vendosur që duhet të arrestohet, atëherë kjo duhet të ndodhë. Çështja kryesore është që korrupsioni duhet luftuar. Ky është një detyrim i madh për Shqipërinë tani. Pra, nëse ky është rezultati përfundimtar ose vendimi që është marrë, atëherë duhet të zbatohet. Por dua të theksoj një gjë këtu: A ka aktualisht parti të vërteta opozitare në Shqipëri? Nëse doni të keni një demokraci të shëndetshme, ju duhet një parti opozitare e mirë. Aktualisht kjo mungon në Shqipëri, dhe është shumë e nevojshme që të ketë parti të tjera që mund të formojnë një opozitë të vërtetë.” Strolenberg shtoi se pas agresionit rus në Ukrainë është më e rëndësishme se kurrë që Bashkimi Evropian të zgjerohet.