“Eurodeputetet e Volt Europa udhëtuan drejt Gjadrit për të inspektuar nga afër kampet e emigrantëve dhe zbatimin e të drejtave të njeriut në këto kampe. Eurodeputetja Anna Strolenberg në një intervistë për Top Neës rrëfen kritikat dhe atë çfarë pa nga afër në kampet e emigrantëve.” “Ende është e vështirë të japim një mendim të qartë sepse qendra është bosh. Por mendoj se këtu ka një çështje më të madhe, dhe ajo është pyetja: pse ekziston kjo qendër këtu? Kjo nuk zgjidh asnjë problem. Ideja ishte të zgjidhej çështja e kthimeve, por nuk po funksionon. Qeveria italiane ka shpenzuar 60 milionë euro për këtë projekt, dhe me shumë gjasë do të kushtojë mbi një miliard euro për pesë vite. Pyetja më e madhe që kam është: pse të shpenzohen kaq shumë para, pothuajse një miliard euro, për një projekt që nuk do të funksionojë, dhe ende nuk e dimë në fund nëse do të respektohen ligjet evropiane? Sigurisht, themi që është territor italian, por gjithashtu është edhe shqiptar, kështu që a mund të garantojmë që gjithçka do të ndodhë sipas ligjeve të BE-së?” Strolenberg nuk përkrah idenë e presidentes Ursula Von Der Leyen apo edhe liderëve të tjerë europiane që po mendojnë të ndjekin shembullin italo-shqiptar. “E shohim tendencën e vendeve të tjera. Pra, thonë: Okay, kemi një problem. Na vijnë shumë njerëz në vendin tonë. Ndoshta i çojmë diku tjetër, i lëmë të bëjnë gjithë procedurën e regjistrimit atje, dhe më pas mund të kthehen. Por unë absolutisht nuk jam dakord me këtë, sepse, po, kemi probleme me migracionin. Por për mua, çështjet janë më shumë rreth asaj nëse ka mjaftueshëm fonde dhe përqendrim për praktika të mira të integrimit. A mund të krijojmë kushte të mira për qendrat e ndalimit dhe qendrat e pritjes në Evropë? Dhe aktualisht, të gjitha paratë po shkojnë për këtë marrëveshje, ku nuk ka asnjë person të sjellë. Në vend të kësaj, mund t’i kishim shpenzuar këto para shumë më mirë.” Strolenberg shton se vendimi i Gjykatës Europiane të Drejtësisë dhe Gjykatës së Romës ngushtoi kategoritë e emigrantëve që mund të vijnë në Shqipëri, duke e bërë thuajse jo funksionale marrëveshjen mes Ramës dhe Melonit.