Euro, monedha e përbashkët europiane ka pasur për herë të fundit vlerën sa një dollar amerikan në dhjetor 2002. Edhe të martën paradite euro mbërriti aty, pas një rënieje prej disa javësh: Një vit më parë modhedha europiane këmbehej me 1,18 dollarë. Ekspertët nuk e përjashtonin mundësinë që euro mund të arrinte sërish barazinë me dollarin. Vlerën më të ulët euro e ka pasur më 5 korrik 2001, kur shënoi 0,8380 dollarë. Janë shqetësimet lidhur me recesionin ato që e rrëzuan monedhën e përbashkët europiane. Sidomos rreziku i ndalimit të gazit u ka ngjallur frikën tregjeve financiare, dhe që nga e hëna ndërprerja e gazit është bërë realitet. Fakti që euro është kaq e dobët kundrejt dollarit ka të bëjë edhe me vlerësimin e monedhës amerikane. Rezerva federale amerikane ka lëvizur shpejt dhe me efikasitet për të luftuar inflacionin dhe ka filluar të rrisë normat e interesit. Kjo bëri që të frikësoheshin bursat, të cilat i druhen një recesioni në SHBA fillimisht. Por tani vëmendja është drejtuar nga evropa. Sepse nëse bie ekonomia në SHBA, atëherë recesioni do të prekë edhe Europën. Ndërkohë tregjet financiare i bëjnë llogaritë duke u mbështetur tek strategjia e rezervës federale amerikane.