Zhvlerësimi i euros karshi lekut ka arritur në të tjera nivele rekord. Kursi i këmbimit zyrtar të Bankës së Shqipërisë tregon se të martën, monedha e përbashkët europiane zbriti për herë të parë poshtë 93 lekëve. Sipas kursit zyrtar të këmbimit, një euro këmbëhej me 92.96 lekë, teksa në pikat e këmbimeve valutore rënia reflektohet edhe më thellë, duke arritur deri në 91 lekë. Vetëm gjatë gushtit, monedha e përbashkët është nënçmuar me 0.57 lekë ndërsa në krahasim me fillimin e këtij viti, euro këmbehet me 3.8 lekë më pak, me një nënçmim prej gati 4 për qind. Ekspertët vlerësojnë se tregu ndodhet nën efektin e prurjeve të sezonit turistik, që në këtë periudhë të vitit arrin pikun e tij. Aktorët e tregut vlerësojnë se shkak janë dy faktorë, së pari flukset informale, që kanë ndikuar sidomos deri në vitin 2024 dhe turizmi, ku vitin e kaluar 12 milionë të huaj vizituan vendin tonë, shifër kjo që pritet të tejkalohet këtë vit. Zhvlerësimin nuk e kanë frenuar as ndërhyrjet agresive të Bankës së Shqipërisë, që në tremujorin e parë të këtij viti tërhoqi nga tregu mbi 140 milionë euro.