Ethet tropikale do të bëhen një kërcënim i madh në jug të shteteve të bashkuara të amerikës, në evropën jugore dhe në pjesë të afrikës, këtë dekadë – tha shefi i shkencëtarëve të OBSH-së, ndërsa temperaturat e ngrohta krijojnë kushte që mushkonjat që mbajnë infeksionin, ta përhapin lehtësisht atë. Sëmundja ka qenë prej kohësh një problem i madh në një pjesë të madhe të azisë dhe amerikës latine, duke shkaktuar rreth 20 mijë vdekje cdo vit. Shkalla e infektimeve është rritur tetëfish në shkallë globale që nga viti 2000, shtyrë nga ndryshimet e klimës por edhe nga lëvizja e shtuar e njerëzve dhe urbanizimi. Shumë raste kalojnë pa u regjistruar por në 2022, 4.2 milionë raste u raportuan në të gjithë botën dhe zyrtarët e shëndetit publik kanë paralajmëruar se nivele transmetimi rekord priten këtë vit. Bangladeshi aktualisht po përjeton shprthimin më të rëndë në histori, me më shumë se 1 mijë vdekje. “Ne duhet të flasim në mënyrë më aktive për ethet tropikale”, tha Xheremi Farrar, një specialist i sëmundjeve infektive që iu bashkua OBSH-së në maj të këtij viti. “Duhet që të përgatisim vendet për mënyrën se si do të përballen me presionin shtesë që do të vijë...në të ardhmen, në shumë qytete të mëdha”. Shumë nga njerëzit që preken nga ethet tropikale nuk kanë simptoma, cka do të thotë që shkalla e infektimit mund të jetë shumë më e lartë nga ajo që raportohet. Ata që kanë simptoma mund të kenë ethe, spazma muskulare dhe dhimbje kyçesh aq të forta që njihen edhe si "ethet e thyerjes së kockave". Në raste më të rralla, më pak se 1% e rasteve, mund të jenë fatale.