Pas evidentimit të rastit të parë të infektuar në Korcë, epidemiologia Adela Vasili ka dalë në një deklaratë lidhur me Ethet e Nilit Perëndimor, duke shpjeguar simptomat kryesore dhe masat që duhet të marrin qytetarët për të ulur rrezikun e infektimit. Vasili theksoi se sëmundja transmetohet përmes mushkonjave dhe nuk përhapet nga njeriu te njeriu. Sipas saj, në vend zbatohet një program dezinfektimi për luftimin e mushkonjave, çka ndihmon në uljen e rrezikut. Sa i përket simptomave, epidemiologia tha se në fazat fillestare sëmundja mund të shfaqet në formën e një gripi të lehtë. Megjithatë, në raste më të rënda mund të shfaqen komplikacione, veçanërisht te grupet vulnerabël. Epidemiologia bëri apel për kujdes të shtuar nga qytetarët, veçanërisht për eliminimin e ujërave të ndenjura, të cilat shërbejnë si ambiente të përshtatshme për shumimin e mushkonjave. Vasili nënvizoi gjithashtu rëndësinë e dezinfektimit, duke veçuar zonat bregdetare si zona me risk më të lartë.