Instituti Kombëtar i Shëndetësisë Publike të Kosovës ka konfirmuar rastin e parë me Virusin e Nilit Perëndimor në Kosovë për vitin 2026. Sipas IKShPK-së, rasti është konfirmuar më 7 gusht nga Laboratori i Mikrobiologjisë. Pacienti është një shtetas i Kosovës, rreth 20 vjeç. Aktualisht ai po trajtohet në Klinikën Infektive të Qendrës Klinike Universitare të Kosovës, ndërsa gjendja e tij shëndetësore raportohet të jetë stabile. Nga hulumtimi epidemiologjik i kryer nga autoritetet shëndetësore rezulton se pacienti nuk ka udhëtuar jashtë Kosovës në vendet ku aktualisht është raportuar qarkullimi i virusit. Virusi i Nilit Perëndimor është sëmundje sezonale, e cila shfaqet kryesisht gjatë muajve të verës dhe transmetohet te njerëzit përmes pickimit të mushkonjave të infektuara. Raste të virusit janë raportuar në disa vende evropiane, përfshirë Italinë, Greqinë, Spanjën, Maqedoninë e Veriut, Rumaninë, Francën dhe Gjermaninë. Megjithatë, virusi nuk transmetohet nga personi te personi përmes kontakteve të zakonshme, por kryesisht përmes pickimit të mushkonjave të infektuara. Ndër rekomandimet kryesore të ekspertëve janë përdorimi i repelentëve, vendosja e rrjetave mbrojtëse në dyer e dritare dhe eliminimi i ujit të ndenjur, ku mund të shumohen mushkonjat. Gjithashtu, qytetarëve u rekomandohet të shmangin qëndrimin jashtë gjatë agimit dhe muzgut, kur mushkonjat janë më aktive, si dhe të mbajnë të pastra pishinat, shatërvanët dhe sipërfaqet ku mund të grumbullohet ujë.