Anëtarja e NATO-s, Estonia po diskuton 'seriozisht' dërgimin e trupave në Ukrainë, në role të pozicionuara larg vijave të frontit, thotë një zyrtar i sigurisë kombëtare. Madis Roll, këshilltar për sigurinë kombëtare i presidentit të Estonisë, i tha gazetës ushtarake Breaking Defense se liderët e vendit të tij po vlerësonin mundësinë e dërgimit të ushtarëve estonezë në role të pozicionuara "mbrapa" që nuk do t’i conin në luftime të drejtpërdrejta në Ukrainë. Një veprim i tillë do të ndihmonte në lehtësimin e krizës së fuqisë ushtarake Ukrainës dhe do ta lejonte atë të dërgonte më shumë ushtarë në vijat e frontit. E ndërsa Estonia, një vend anëtar i NATO-s, preferon të veprojë së bashku me anëtarë kryesorë të aleancës, ajo gjithashtu nuk është e mbyllur ndaj idesë për tu bashkuar me një grup më të vogël aleatësh, tha Roll. "Diskutimet janë duke vazhduar," tha Roll për Breaking Defense. "Ne duhet të shikojmë të gjitha mundësitë. Nuk duhet të kemi kufizime për atë se çfarë mund të bëjmë." Më herët, edhe shefi i mbrojtjes së vendit, gjenerali Martin Herem, kishte thënë se Estonia kishte nisur biseduar brenda vendit për dërgimin e trupave në Ukrainë. Por nuk kishte pasur një "diskutim serioz" për shkak të shqetësimeve politike të brendshme. Estonia është një nga anëtarët e NATO-s, gjeografikisht më të afërt me Rusinë, me një kufi lindor të përbashkët me rajonet ruse të Pskovit dhe Leningradit. Ushtria e saj mbështetet kryesisht në njësitë rezerviste, me rreth 4,200 pjesëtarë të përhershëm dhe 38,000 trupa rezervë të gatshme për operacionet e kohës së luftës. Numri i përgjithshëm i estonezëve me trajnim ushtarak është 230 mijë, nga 1.3 milionë banorë që vendi ka. Talini i bashkohet tani një kori në rritje të anëtarëve të aleancës që thonë se ekziston mundësia e mbështetjes së Ukrainës me trupa, me presidentin francez Emmanuel Macron që ka ndezur zemërimin e Moskës pas deklaratave të përsëritura të tij. Shtetet baltike po ndjekin shembullin. Kryeministrja e Lituanisë Ingrida Šimonytė i tha Financial Times më 8 maj se ajo kishte autoritetin nga parlamenti për të vendosur trupa në Ukrainë për trajnime, por se Kievi nuk e kishte paraqitur ende një kërkesë të tillë. NATO-s ka nevojë për konsensusin e anëtarëve të saj për të dërguar trupa si një aleancë në një zonë lufte, por shtetet individuale mund të vendosin forcat e tyre sipas nevojës. Rusia, ndërkohë, ka thënë se çdo prani e konsiderueshme e trupave të NATO-s në Ukrainë do të shihej si një përshkallëzim i madh, duke kërcënuar më pas me rrezikun e luftës bërthamore.