Kryeministri në detyrë i Kosovës, Albin Kurti, ka vizituar këtë të shtunë vendodhjen e gërmimeve në Zubin Potok, ku dyshohet se gjenden mbetje mortore të 23 intelektualëve të Mitrovicës të zhdukur gjatë luftës. Kurti deklaroi se zhvillimet në këtë bend po dëshmojnë përpjekjet për fshehjen e krimeve të luftës, teksa bëri të ditur se gjatë kohës sa ndodheshin në terren janë zbuluar edhe eshtra të tjera. Kryeministri në detyrë tha se Qeveria do të ofrojë mbështetje të plotë për procesin e gërmimeve, me synimin që familjet e personave të zhdukur ta mësojnë fatin e më të dashurve të tyre. Ai u shpreh se duhet të priten rezultatet e analizave të ADN-së, por se me shumë mundësi eshtrat e gjetura u përkasin grupit prej 23 intelektualëve nga Mitrovica, të cilët, sipas tij, u ndaluan, rrëmbyen dhe u ekzekutuan nga forcat serbe më 19 prill 1999. Kurti paralajmëroi se gërmimet do të vazhdojnë për javë apo edhe muaj, pasi mbetjet mortore janë gjetur të shpërndara. Ai shtoi se vendndodhja e varrezës masive është e vështirë për t’u arritur me automjet, duke vlerësuar se kjo ishte bërë me qëllim të fshehjes së krimit. Kurti kërkoi hapjen e arkivave në Beograd, ndërsa në lidhje me retorikën e zyrtarëve serbë ndaj Kosovës, tha se ajo synon të mbulojë krimet e kryera gjatë luftës.