Një rast jo I shumë I zakontë është regjistruar mesditen e së enjtes, ku një 48-vjeçar është munduar të ndalojë shtrimin e një rruge. Personi në fjalë është identifikuar si Arjan Dervishi, banues në Mamurras, I cili pretendonte se rruga kalonte në pronën e tij. Mësohet se ai ka kërcënuar me armë gjahu në fshatin Shpërdhet të Kurbinit, disa punonjës të një firme private, të cilët po merreshin me shtrimin e një rruge. Policia mbërriti menjëherë në vendngjarje, ku parandaloi një ngjarje të mundshme kriminale. “Nga hetimet paraprake, dyshohet se 48-vjeçari, për shkak se pretendon pronësinë mbi këtë territor, ka kërcënuar me armë gjahu, punonjësit e një firme private, të cilët në kuadër të një projekti të miratuar nga bashkia e Kurbinit, po merreshin me shtrimin e rrugës së guroreve”, bën me dije policia. Në momentin e ndërhyrjes, Policia i ka sekuestruar 48-vjeçarit, armën e gjahut “Shotgun” dhe municion luftarak. Materialet procedurale i kaluan Prokurorisë pranë Gjykatës së Rrethit Gjyqësor Kurbin, për veprime të mëtejshme.