Irani ka këmbëngulur se udhëheqësi i tij i ri suprem nuk ka vdekur dhe po 'e menaxhon plotësisht situatën' pasi Presidenti amerikan Donald Trump vuri në pikëpyetje faktin nëse ai është ende gjallë. Mojtaba Khamenei nuk është parë në publik që nga zgjedhja e tij si udhëheqës suprem më 8 mars, dhe fjalimi i tij i parë publik u lexua nga një prezantues gjatë një transmetimi nga media shtetërore më 12 mars. Duke folur për agjencinë e lajmeve me bazë në Londër The Neë Arab, ministri i jashtëm iranian Abbas Araghchi tha se Mojtaba Khamenei është 'në shëndet të mirë' dhe 'po e kontrollon plotësisht situatën'. Ai tha se Irani mirëpret çdo 'iniciativë rajonale që çon në një fund të drejtë të luftës', dhe Hormuzi është 'i hapur për të gjithë përveç anijeve amerikane dhe atyre të aleatëve të SHBA-së'. Araghchi ka thënë se 'nuk ka asnjë iniciativë të veçantë në tryezë deri më tani për t'i dhënë fund luftës'. Në një intervistë për NBC, Presidenti amerikan tha se kishte dëgjuar që Mojtaba Khamenei "nuk është gjallë", duke shtuar se "deri më tani, askush nuk ka qenë në gjendje ta shohë atë". Komentet e Trump vijnë një ditë pasi Pete Hegseth, sekretari i luftës, tha se udhëheqësi i ri ka të ngjarë të jetë "i shpërfytyruar" pasi u plagos në sulmet e SHBA-së dhe Izraelit. Babai i Mojtaba Khameneit, Ali Khamenei, i cili kishte sunduar Iranin për 37 vjet, u vra kur kompleksi i tij në Teheran u rrafshua me tokën në ditën e parë të sulmit më 28 shkurt.