Prokuroria Kundër Krimit të Organizuar dhe Korrupsionit, kërkoi pushim të çështjes ndaj Met Kananit, i arrestuar në Turqi për trafik lëndësh narkotike. Ky vendim ka ardhur si rezultat i faktit se Met Kanani është dënuar edhe në shtetin turk dhe si pasojë nuk mund të vazhdojnë hetimet ndaj tij. Met Kanani i cilësuar shpesh si “Eskobari Shqiptar” është kreu i një ndër organizatave më të mëdha kriminale e përbërë nga 66 persona të kombësive të ndryshme. Kanani shfrytëzonte vende si Shqipëria dhe Maqedonia e Veriut për të dërguar drogë drejt Turqisë. Greqia dhe Italia gjithashtu shërbenin si rrugë kalimi për lëndët narkotike të Eskobarit Shqiptar. Në nëntor të vitit 2017, në Greqi janë kapur 1.6 ton kanabis pas një përleshjeje në det ndërmjet autoriteteve policore dhe trafikantëve të drogës. Met Kanani ka qenë i dyshuar se ka tentuar të çojë në Greqi këtë sasi droge, ku njerëzit e bandës së tij kriminale janë përplasur me Policinë. Ndërkohë kreu i kësaj organizate të fuqishme kriminale, Met Kanani është arrestuar në Turqi disa kohë më parë dhe ndodhet në burg, së bashku me disa shqiptarë të tjerë bashkëpunëtorë të tij.