Pas ndryshimeve në qeveri, parlament dhe administratë po ndërmerren edhe lëvizje në trupin diplomatik. Burime për Top News bëjnë me dije se Erlis Hereni do të shërbejë si sekretar i parë pranë misionit në Organizatën e Kombeve të Bashkuara. Vendimi është marrë nga ministri i punëve të jashtme, Igli Hasani por aktualisht po kryhen procedurat e akreditimit deri në marrjen e letrave kredenciale. Hereni ka shërbyer si drejtor i përgjithshëm i shpronësimeve si dhe administrator i shoqërisë publike Albanian Seaports Development Company, subjekti që kontrollon aksionet e shtetit shqiptar në projektin për Marinën e Durrësit. Shqipëria ka misione të përhershme diplomatike në selinë e OKB-së në Nju Jork dhe zyrat e OKB-së në Gjenevë dhe Vjenë. Gjatë anëtarësimit të saj në Kombet e Bashkuara, Shqipëria i ka kushtuar vëmendje të veçantë çështjeve që lidhen me ruajtjen e paqes dhe forcimit të sigurisë në mbarë botën.