Presidenti turk, Recep Tayyip Erdogan zhvilloi këtë të dielë një bisedë telefonike me homologun e tij rus, Vladimir Putin, ku në fokus ishte zgjerimi I bashkëpunimit tregtar mes të Ankarasë dhe Moskës. “Presidenti Erdogan ka deklaruar se ai synon rritjen e bashkëpunimit në mes të Turqisë dhe Rusisë në disa drejtime, përfshirë zgjerimin e volumit tregtar”, tha Presidenca turke përmes një deklarate. Ndonëse ka qenë e shpejtë në dënimin e luftës së Rusisë në Ukrainë, Turqia po mban qëndrim neutral për këtë luftë, dhe nuk i ka ndjekur politikat e Perëndimit për vendosje të sanksioneve kundër Moskës. Erdogan e ka justifikuar politikën për shkak të varësisë së Turqisë ndaj naftës dhe gazit rus. Lufta në Ukrainë ka nisur më 24 shkurt të vitit 2022. Presidenti rus, Vladimir Putin, e quan luftën “operacion special ushtarak” për të çmilitarizuar Ukrainën.