Presidenti turk Recep Tayyip Erdogan ka deklaruar se Turqia po intensifikon përpjekjet diplomatike për të ulur tensionet mes Shteteve të Bashkuara dhe Iranit, në një kohë kur përplasja mes Uashingtonit dhe Teheranit vazhdon të mbajë rajonin nën presion. Qëndrimin e Ankarasë, Erdogan e shprehu gjatë një bisede telefonike me presidentin e Emirateve të Bashkuara Arabe. Sipas Presidencës turke, dy liderët diskutuan marrëdhëniet mes vendeve të tyre, si edhe zhvillimet e fundit rajonale dhe ndërkombëtare. Erdogan theksoi se Turqia po punon për t’i dhënë fund tensioneve mes Iranit dhe SHBA-së, si dhe konflikteve të tjera në rajon, duke deklaruar se Ankaraja do të vijojë iniciativat diplomatike në favor të paqes. Ai shtoi gjithashtu se Turqia nuk miraton sulmet ndaj vendeve që i konsideron mike dhe vëllazërore. Përpjekjet diplomatike kanë vijuar edhe në nivel ministror. Ministri i Jashtëm turk, Hakan Fidan, ka zhvilluar një bisedë telefonike me homologun e tij iranian, ku në fokus kanë qenë zhvillimet e fundit në negociatat mes Teheranit dhe Uashingtonit. Me këto lëvizje, Turqia duket se po kërkon të luajë rolin e ndërmjetësuesit mes palëve, duke shfrytëzuar marrëdhëniet që ruan si me SHBA-në, ashtu edhe me Iranin dhe vendet e Gjirit. Ndërhyrja diplomatike e Erdoganit vjen në një moment delikat për Lindjen e Mesme, ndërsa tensionet mes Uashingtonit dhe Teheranit kanë shtuar shqetësimet për një përshkallëzim më të gjerë në rajon.