Policia turke ka arrestuar 110 persona që dyshohet se kanë lidhje me militantët, sipas burimeve të sigurisë, raporton agjencia e lajmeve Reuters. Në mesin e të arrestuarve, sipas raporteve ka politikanë, avokatë dhe gazetarë, që janë arrestuar në lidhje me zgjedhjet e 14 majit. Siç raportohet, operacioni u përqendrua në Dijarbakir, qytetin më të madh të banuar me shumicë kurde në juglindje të Turqisë. Operacione policore janë zhvilluar edhe në 21 provinca të tjera, duke shënjestuar persona që akuzohen se kanë lidhje me grupin militant të Partisë së Punëtorëve të Kurdistanit. Ky operacion vjen më pak se tre javë para zgjedhjeve presidenciale dhe parlamentare, që përbëjnë edhe sfidën më të madhe zgjedhore për presidentin Recep Tayyip Erdogan, që kur Partia e tij, Për Drejtësi dhe Zhvillim, erdhi në pushtet më 2002. “Në prag të zgjedhjeve, nga frika se do të humbin pushtetin, ata kanë nisur sërish operacionet e arrestimeve”, shkroi në Tëitter, Tayip Temel, ligjvënës nga Partia Popullore Demokratike. Ai tha se politikanë, përfshirë edhe anëtarë të partisë së tij, gazetarë, artistë dhe avokatë janë në mesin e personave që u arrestuan në Dijabakir mëngjesin e së martës. Erdogan shpesh ka akuzuar Partinë Popullore Demokratike se ka lidhje me Partinë e Punëtorëve të Kurdistanit. Por, ky subjekt politik ka hedhur poshtë këto akuza. Partia Popullore Demokratike muajin e kaluar nuk garoi me ndonjë kandidat për zgjedhjet presidenciale të 14 majit, por ofroi mbështetje për rivalin kryesor të Erdoganit, Kemal Kilicdaroglu.