Presidenti turk Rexhep Tajip Erdogan ka përgatitur një propozim për të ngrirë luftën mes Rusisë dhe Ukrainës, raporton Bloomberg, duke cituar burime të mirë informuara. Plani supozohet se do të prezantohet në takimin e liderëve të G20 në Rio de Zhaneiro. Iniciativa e Erdogan thuhet se përfshin shtyrjen e diskutimeve për anëtarësimin e Ukrainës në NATO për të paktën një dekadë, një veprim i përshkruar si një "lëshim ndaj Putinit". Propozimi sugjeron gjithashtu krijimin e një zone të çmilitarizuar në Donbasin lindor, të mbikëqyrur nga forcat paqeruajtëse ndërkombëtare dhe ofrimin e mbështetjes ushtarake të Ukrainës si kompensim për shtyrjen e pranimit në NATO. Sipas zyrtarëve turq që folën për Bloomberg, ndërkohë që plani mund të jetë i vështirë për t'u pranuar nga Ukraina, ai konsiderohet si "qasja më realiste" për arritjen e një armëpushimi të qëndrueshëm. Propozimi kërkon shtyrjen e diskutimeve për statusin e territoreve të pushtuara nga Rusia, në mënyrë që fokusi të vendoset te de-përshkallëzimi i menjëhershëm i luftës. Erdogan thuhet se synon të presë bisedimet e paqes në Stamboll. Presidenti ukrainas Volodymyr Zelensky nuk merr pjesë në Samitin e G20, pasi presidenti brazilian Luiz Inácio Lula da Silva refuzoi ta ftojë atë. Edhe presidenti rus Vladimir Putin po ashtu mungon për shkak se, sic ka thënë kremlini, nuk donte të prishte forumin me debatet mbi urdhërarrestin ndërkombëtar të lëshuar ndaj tij. Përpjekjet për të ndërmjetësuar paqen kanë marrë vrull kohët e fundit, me kancelarin gjerman Olaf Scholz që zhvilloi edhe bisedën e parë telefonike të tij me Putinin në dy vjet, ndërsa presidenti francez Emmanuel Macron ka sinjalizuar angazhim të mundshëm kur kushtet të jenë të favorshme. Vetë, Zelensky theksoi në një intervistë të fundit se Ukraina synon të kërkojë një zgjidhje diplomatike të konfliktit brenda vitit të ardhshëm.