Presidenti i Turqisë, Tayyip Erdogan, tha të martën se i çmon “përpjekjet dhe lidershipin” e Donald Trumpit për t’i dhënë fund luftës në Rripin e Gazës, pasi presidenti amerikan siguroi mbështetjen e kryeministrit të Izraelit, Benjamin Netanyahu, për propozimin amerikan për paqe. Pas bisedimeve mes Trumpit dhe Netanyahut në Uashington të hënën, Shtëpia e Bardhë publikoi një plan me 20 pika për Gazën. “Unë përshëndes përpjekjet dhe lidershipin e presidentit amerikan Donald Trump, që synon ndaljen e gjakderdhjes në Gaza dhe arritjen e një armëpushimi”, tha Erdogan, i cili javën e kaluar u takua me Trumpin në Shtëpinë e Bardhë për herë të parë pas gjashtë vjetësh. Turqia do të vazhdojë të kontribuojë në këtë proces “me synimin për të vendosur paqe të drejtë, të qëndrueshme dhe të pranueshme për të gjitha palët”, shkroi Erdogan në X.