Turqia lëshoi në orbitë satelitin e saj të parë të prodhuar në vend, Turksat 6A, herët të martën, në një lëvizje që Ankaraja tha se “do të siguronte mbulimin satelitor të vendit dhe do të përmbushte nevojat e tij për transmetime televizive. Një raketë SpaceX Falcon 9 e çoi satelitin në hapësirë nga Stacioni i Forcave Hapësinore Cape Canaveral në Florida, të Shteteve të Bashkuara. Presidenti turk Recep Tajip Erdogan tha se lëshimi i satelitit shënoi hapjen e një "faze të re " për Turqinë në prodhimin e satelitëve. “Si Turqi, kemi prodhuar më shumë se 81% të nënsistemeve, stacioneve tokësore satelitore dhe softëerëve në projektin 6A, i cili ka një rëndësi të madhe për të ardhmen e vendit tonë në hapësirë, edhe për faktin se jemi mbështetur plotësisht në burimet kombëtare”, tha ai. Ministri i Transportit dhe Infrastrukturës Abdulkadir Uraloglu tha se sinjali i parë nga Turksat 6A u mor 67 minuta pas nisjes, siç ishte planifikuar, duke shtuar se sateliti do të siguronte mbulimin e të gjithë vendit. "Do të kemi komunikimet tona, transmetimet tona televizive në një nivel më të sigurt dhe më të mirë," tha ai. Turqia kishte lëshuar më parë satelitë duke përdorur raketa nga SpaceX po ashtu. Uraloglu tha se Turksat 6A është rezultat i një pune 10-vjeçare për të prodhuar në vend një satelit, duke shtuar se kjo do të thotë se Turqia u bë një nga 11 vendet e vetme në botë që e kanë bërë këtë.