Një gjykatë turke ka burgosur 18 punonjës të bashkisë së Stambollit, të cilët po presin gjykimin nën akuza për korrupsion, raportoi agjencia shtetërore e lajmeve, Anadolia. Njoftimi vjen në mes të shtypjes së opozitës në Turqi dhe pas arrestimit të kryetarit të bashkisë së Stambollit, Ekrem Imamoglu. Imamoglu, rivali kryesor politik i presidentit turk, Recep Tayyip Erdogan, u burgos në mars dhe tani po pret gjykimin nën akuza për korrupsion. Ai po ashtu akuzohet se ka ndihmuar një grup terrorist. Imamoglu i ka mohuar të gjitha akuzat dhe arrestimi i tij nxiti protestat më të mëdha në Turqi në dekadën e fundit, trazira dhe akuza për gjyqësor të politizuar. Transmetuesi NTV ka raportuar se 34 nga 52 personat që u arrestuan gjatë fundjavës janë liruar tani me kusht. Mediat turke raportuan të shtunën se autoritetet kishin ndaluar dhjetëra punonjës të Bashkisë së Stambollit, si pjesë e hetimit gjyqësor të fokusuar rreth Imamoglut, duke zgjeruar shtypjen ndaj opozitës, që nisi vitin e kaluar. Në mesin e zyrtarëve të arrestuarve janë edhe sekretari i Përgjithshëm i bashkisë, shefi i stafit të Imamoglu, kryetari dhe nënkryetari i administratës së ujrave në Stamboll dhe kreu i këtij departamenti.