Presidenti i Turqisë, Recep Tayyip Erdogan, ka kundërshtuar vendimin e Shteteve të Bashkuara të amerikës për të lejuar Ukrainën të përdorë raketat amerikane me rreze të gjatë veprimi, duke thënë se kjo do ta ndezë konfliktin edhe më shumë. Të martën, Ukraina përdori për herë të parë raketat amerikane me rreze të gjatë veprimi, ATACMS, për të kryer sulme në tokën ruse, duke shfrytëzuar lejen që administrata në largim e presidentit amerikan, Joe Biden, i dha në ditën e 1.000-të të luftës. Të njëjtën ditë, presidenti rus Vladimir Putin ndryshoi doktrinën bërthamore të Rusisë, duke ulur pragun për përdorimin e armëve bërthamore nga Moska si përgjigje ndaj sulmeve nga një armik që përdor armë konvencionale. “Hapi i Bidenit do të interpretohej si lëvizje për të ndezur luftën dhe për t’u siguruar që ajo nuk do të mbarojë kurrë, por vetëm do të përhapet”, tha Erdogan për gazetarët që e shoqëronin në avion, ndërsa po kthehej në turqi nga Brazili, ku mori pjesë në samitin e G20-ës. “Ky hap, jo vetëm që do të përshkallëzojë konfliktin, por do të nxisë përgjigje më të fuqishme nga Rusia”, tha ai, duke i bërë thirrje Moskës dhe Kievit për vetëpërmbajtje. Turqia, anëtare e NATO-s, thotë se mbështet integritetin territorial të Ukrainës, dhe a dënuar pushtimin rus duke i dhënë madje Kievit mbështetje ushtarake. Por, ajo kundërshton gjithashtu edhe sanksionet e Perëndimit kundër Moskës, me të cilën ka marrëdhënie të rëndësishme në fushat e turizmit, mbrojtjes dhe energjisë.