Kryeministri Edi Rama inspektoi punimet në kantierin e parkut fotovoltaik “Blue 1” në Fier nga ku u shpreh se ky investim është pjesë e projektit qeveritar për të shndërruar Shqipërinë në eksportuese neto të energjisë elektrike. “Plani për të pavarësuar plotësisht Shqipërinë nga pikëpamja e energjetike për ta bërë eksportuese neto është gjithmonë e më realist duke marrë parasysh këto dhe jo vetëm këto, por dhe investime të tjera që po shkojnë paralelisht, duke filluar nga Skavica që është në proces, duke vazhduar me këto të erës plus edhe komponentët e tjerë rreth tyre me gazin e lëngshëm që futet në lojë, me projektin e parë të gazifikimit që jemi duke e hartuar së bashku me partnerët tanë të Azerbajxhanit.” Rama nënvizoi se do të shmanget investimi në tokat prodhuese bujqësore , përveç rasteve kur pjelloria e tokës është nën mesatare.