Në Kosovë është përuruar nisja e punës në parkun e prodhimit të energjisë nga era, të vendosur në zonën e Zatriqit në Rahovec. Bëhet fjalë për një investim privat me vlerë 106 milionë euro dhe prodhim vjetor prej 185 megavat. Kryeministri në detyrë, Albin Kurti tha prodhimi nga ky park mbulon nevojat vjetore për energji të rreth 45 mijë familjeve. “Me këtë park të ri të erës, po shtojmë një tjetër gur në themelet e një të ardhmeje energjetike më të pastër, më të sigurt dhe më të qëndrueshme në Kosovë. Me 12 turbina, secila me kapacitet fuqie prej 6.1 megavatë, ky park është një investim shumë i rëndësishëm në teknologjinë moderne dhe në kapacitetet tona të reja energjetike. Nga ky kapacitet vendi ynë pritet të kursejë mbi 27 milionë euro në vit”, deklaroi ai. Burimi kryesor i energjisë në Kosovës, gjithsesi mbetet prodhimi nga termocentralet me qymyr.