Ukraina tha të shtunën se Rusia ka kryer sulme të ashpra kundër termocentraleve të saj gjatë natës. DTEK, kompania më e madhe energjetike e Ukrainës, tha se katër termocentrale të saj janë goditur. “Armiku përsëri bombardoi fuqishëm objektet energjetike ukrainase”, tha DTEK në një deklaratë. “Pajisjet e kompanisë janë dëmtuar rëndë. Punonjësit e energjisë janë duke punuar tani për eliminimin e pasojave të sulmit”. Ministri ukrainas i Energjisë, Herman Halushchenko, tha se sulmet ruse kishin në shënjestër rajonin Dnipropetrovsk në Ukrainën qendrore dhe rajonet perëndimore Lviv dhe Ivano-Frankivsk. Halushchenko tha se një punëtor është plagosur. DTEK raportoi për viktima, por nuk dha hollësi. Kundërajrorët ukrainas rrëzuan 21 prej 34 raketave ruse gjatë natës, tha komandanti i Forcës Ajrore të Ukrainës të shtunën. Gjatë muajit të fundit, ushtria ruse ka intensifikuar sulmet ndaj infrastrukturës energjetike të Ukrainës, duke vënë në shënjestër termocentralet dhe hidrocentralet e vendit pothuajse çdo ditë. Zyrtarët ukrainas kanë thënë se vendi ka humbur rreth 80 për qind të prodhimin të energjisë nga termocentralet dhe 35 për qind nga hidrocentralet, duke e detyruar Qeverinë të vendosë reduktime të energjisë në disa rajone.