Kryeministri i Polonisë tha se "ëndrron" për një "Breturn" në vend të Brexit, ndërsa ai diskutoi një traktat të mbrojtjes me homologun britanik Keir Starmer. Ish-presidenti i Këshillit Evropian Donald Tusk e bëri deklaratën ndërsa priti kryeministrin britanik për diskutime mbi një pakt të mbrojtjes mes Britanisë dhe Polonisë në Varshavë. Udhëheqësi polak, i cili ishte president i Këshillit Evropian në vitet kur Britania doli nga BE, tha se kishin biseduar për "bashkëpunimin mes Britanisë së Madhe dhe Bashkimit Evropian". “Jam i sigurt se e mbani mend kur mësuam rezultatet e referendumit të Brexit-it. Unë isha kryetar i Këshillit Evropian në atë kohë. Reagimi im i parë emocional ishte të thosha: që tani më mungon”, tha ai. Kryeministri polak vazhdoi duke thënë se ishte një ëndërr e tij që brexiti të kthehej në ‘Breturn’. “Ndoshta ky është vetëm një iluzion, por më mirë të jem optimist dhe ti mbaj këto ëndrra gjallë, ndonjëherë ato bëhen realitet”. Kryeministri britanik Keir Starmer, ka qenë në rolin e sekretarit në hije të Brexitit ndërsa laburistët ishin në opozitë. Por, ai e ka përjashtuar mundësinë e ribashkimit me bashkimin doganor evropian apo tregun unik. Në anën tjetër, ai kërkon të thellojë lidhjet me brukselin pas brexitit.