Ukraina dhe Rusia njoftuan të mërkurën shkëmbimin e parë të robërve të luftës që prej afro pesë muajve, duke liruar nga mbi 200 vetë secila palë, pas negociatave të ndërmjetësuara nga Emiratet e Bashkuara Arabe që Moska i cilësoi komplekse. Ministria ruse e mbrojtjes tha se 248 pjesëtarë të personelit të saj ushtarak ishin dorëzuar nga Ukraina. Kievi tha se i ishin kthyer 230 persona - 224 ushtarë dhe gjashtë civilë - në atë që tha se ishte shkëmbimi më i madh i dokumentuar i trupave deri tani. Qendra e koordinimit të të burgosurve të Ukrainës konfirmoi gjithashtu rolin e Emirateve të Bashkuara Arabe, pa dhënë detaje. Pavarësisht mungesës së një dialogu për t’i dhënë fund luftës 22-mujore, Kievi dhe Moska kanë realizuar disa shkëmbime të burgosurish që nga muajt e parë të pushtimit rus në shkurt 2022.