Emiratet e Bashkuara Emiratet e Bashkuara Arabe thanë se po largoheshin nga OPEC-u, duke i dhënë një goditje grupit të prodhuesve të naftës, pasi një krizë e paprecedentë energjitike e shkaktuar nga lufta e Iranit ekspozon mosmarrëveshjet midis vendeve të Gjirit. Dalja e Emirateve të Bashkuara Arabe, një nga prodhuesit më të mëdhenj të grupit, dobëson kontrollin e OPEC-ut mbi furnizimet globale të naftës dhe zgjeron një përçarje mes Emirateve të Bashkuara Arabe dhe fqinjës së saj Arabisë Saudite, që është në fakt udhëheqësja e Organizatës së Vendeve Eksportuese të Naftës. Kjo gjithashtu mund t'i japë liri Emirateve të Bashkuara Arabe për të rritur prodhimin sapo të rifillojnë eksportet përmes Gjirit, pasi nuk do të kufizohen më nga kuotat e OPEC-ut. Në komentet e tij të para publike që nga njoftimi, Ministri i Energjisë i Emirateve të Bashkuara Arabe, Suhail Mohamed al-Mazrouei, tha se vendimi u mor pasi u shqyrtuan strategjitë energjetike të vendit. Ai tha se Emiratet e Bashkuara Arabe nuk e kishin diskutuar çështjen me asnjë vend tjetër. "Ky është një vendim politik, është bërë pas një shqyrtimi të kujdesshëm të politikave aktuale dhe të ardhshme që lidhen me nivelin e prodhimit", tha Mazrouei. Ai tha gjithashtu se bota do të kërkonte më shumë energji, duke nënkuptuar se Emiratet e Bashkuara Arabe do të ishin të gatshme për të përmbushur këtë nevojë. Çmimet e naftës në tregjet ndërkombëtare ulën fitimet të martën pas njoftimit të Emirateve të Bashkuara Arabe se më 1 maj do të largoheshin nga OPEC dhe OPEC+. Dikur aleatë të fortë, Emiratet dhe Arabia saudite kanë zhvilluar një rivalitet të zjarrtë, duke u përplasur në çështje që variojnë nga politika e naftës dhe gjeopolitika rajonale deri te gara për talente dhe kapital të huaj.