Numri i të punësuarve në moshë pune ka pësuar një rënie të ndjeshme gjatë tremujorit të parë të vitit 2026. Sipas të dhënave të INSTAT, krahasuar me të njëjtën periudhë të një viti më parë, në tregun e punës rezultojnë 32,736 persona më pak të punësuar, ndërsa rritje është regjistruar vetëm te grupmosha mbi 64 vjeç. Rënia më e fortë është shënuar te të rinjtë 15–29 vjeç, ku numri i të punësuarve ka rënë me rreth 8%. Edhe grupmosha 30–64 vjeç, që përbën bazën kryesore të fuqisë punëtore, ka humbur mbi 18 mijë të punësuar, ose 2.1% më pak në terma vjetorë. Në të kundërt, sipas revistës Monitor numri i pensionistëve që vazhdojnë të punojnë është rritur ndjeshëm. Në tremujorin e parë të vitit 2026, 140,713 persona mbi 64 vjeç rezultojnë të punësuar, rreth 17.7 mijë më shumë se një vit më parë. Pesha e tyre në totalin e të punësuarve është rritur nga 10.5% në 12.2%.