Një person ka humbur jetën dhe një tjetër është plagosur pas një zjarri të rënë në një magazinë në zonën e Fllakës në Durrës. Zjarri ka rënë rreth orës 8:00 të mëngjesit të kësaj të diele, i cili ka përfshirë ambientin ku gatuhej për punonjësit e subjektit me administrator shtetasin S. M. Dyshohet se shkak i zjarrit ka qenë shpërthimi i një bombule gazi. Si pasojë e asfiksisë ka humbur jetën 25-vjeçari nga Bangladeshi Omar Faruk. Një tjetër punonjës, rreth 30 vjeç, nga Kenia, është transportuar në spital, ku po merr ndihmë mjekësore. Në vendngjarje mbërritën menjëherë shërbimet e Policisë dhe forcat zjarrfikëse, të cilat bënë të mundur izolimin dhe fikjen e flakëve. Grupi hetimor, nën drejtimin e Prokurorisë, vijon punën për zbardhjen e plotë të rrethanave të ngjarjes, përcaktimin e shkakut të zjarrit dhe dokumentimin ligjor të rastit.