Enklava e Spanjës në Afrikën Veriore, Ceuta, po përjeton një emergjencë humanitare dhe sigurie, pasi 1,500 migrantë mbërritën në qytet duke notuar nga Maroku gjatë javës së kaluar, tha të enjten udhëheqësi i territorit. Ceuta, së bashku me Melillën, një tjetër qytet autonom spanjoll i vendosur në Afrikën e Veriut, përfaqëson kufirin e vetëm tokësor të Bashkimit Evropian me Afrikën. Të dy qytetet përjetojnë periodikisht rritje të përpjekjeve për kalim nga migrantët që synojnë Evropën. Juan Jesus Vivas, udhëheqësi I Ceutës, tha se fluksi i fundit kishte mbingarkuar sistemin e pritjes së qytetit dhe kishte lënë qindra migrantë të flinin jashtë. "Po përballemi me një situatë të emergjencës absolute humanitare dhe sociale", tha ai, duke shtuar se objektet për të miturit e pashoqëruar po funksiononin me 2,400% të kapacitetit. Ai e përshkroi situatën si një emergjencë kombëtare dhe bëri thirrje për një përgjigje "vendimtare, të fuqishme, të menjëhershme dhe të koordinuar" nën një strukturë të vetme komande.