Protestuesit kanë djegur kampet e emigrantëve në Ceuta ndërsa tensionet janë rikthyer për shkak të shkeljeve të përsëritura të kufirit në territorin spanjoll. Pamjet tronditëse tregojnë flakët që përfshijnë tendat e kampit dhe tym që ngrihet në ajër në vendet ku mijëra njerëz kanë qëndruar që nga një "pushtim" i madh kufitar muajin e kaluar. Banorët vendas të Cuetas u panë duke valëvitur flamujt spanjollë pasi u afruan në zonë dhe u përleshën me policinë që ruante kampet. Vendasit shfrynë zemërimin e tyre duke shkatërruar çadrat e improvizuara. Dëshmitarët thanë se disa nga emigrantët u përgjigjën duke hedhur gurë mbi protestuesit. Tensionet u rritën pasi një turmë prej rreth 70 migrantësh sulmuan një automjet ushtarak të enjten, duke shkaktuar hakmarrje të zemëruar nga vendasit. Një ushtar brenda kamionit u plagos ndërsa policia arrestoi 12 marokenë për sulmin. Shumë njerëz po fajësojnë qeverinë për mungesë veprimi dhe për mos largimin e emigrantëve. Tensionet dhe përplasjet me policinë janë shtuar ditët e fundit. Të enjten, dhjetëra njerëz organizuan një protestë për të bllokuar pakot ushqimore të Kryqit të Kuq të destinuara për emigrantët. Një ditë më parë, policia përdori gazin lotsjellës për të shpërndarë protestuesit pranë kampeve të emigrantëve. Roja civile spanjolle ka forcuar kontrollin por varkat me emigrantë nuk po ndalen.