Pasi shkalla e parë rrëzoi padinë e kryebashkiakut të Tiranës Erion Veliaj për emërimin e prokurorit të posaçëm Ols Dado, çështja përfundon në gjykatën administrative të Apelit. Këtë të mërkurë është hedhur çështja për ankimimin e kryebashkiakut të Tiranës, ndërsa çështja i ka rënë gjyqtares Blerona Hasa. Veliaj ankimoi vendimin e gjykatës së shkallës së parë, e cila nuk shqyrtoi në themel çështjen që kryebashkiaku ka ngritur ndaj prokurorit të SPAK, Ols Dado. Në shkallën e parë më 24 korrik, gjyqtari Hazbi Balliu rrëzoi kërkesën me argumentin se Veliaj ka interes të tërthortë jo të drejtpërdrejtë, ndërsa bashkia e Tiranës nuk ka asnjë interes. Kryebashkiaku, teksa ishte i pranishëm në seancë, këmbënguli se është rrëmbyer nga detyra, sipas tij nga një prokuror i emëruar në mënyrë të paligjshme në vitin 2008. Tashmë pritet që çështja të shqyrtohet në Apel, ndërsa vetëm një ditë më parë, Veliaj pati një tjetër betejë gjyqësore në Gjykatën e Lartë. Kjo e fundit, la në fuqi arrestin në burg të dhënë nga Apeli i GJKKO, megjithëse do duhet të arsyetojë se përse masa është proporcionale në lidhje me detyrën.