Njeriu më i pasur në botë, Elon Musk, ka nxitur spekulime pas ndryshimit të emrit të tij në rrjetin social X, duke e bërë atë “Kekius Maximus”. Bosi i Teslas, space X dhe X, njëkohësisht mbështetës i madh i presidentit të zgjedhur amerikan, Donald Trump, nuk ka dhënë ndonjë sqarim pse e ka ndryshuar emrin dhe fotografinë e profilit, në të cilën është tani shihet karakteri Bretkosa Pepe, një imazh humoristik, ose meme, që është përdorur shumë nga grupet e ekstremit të djathtë. Ky hap ka shkundur botën e kriptovalutave, pasi vlera e valutës memecoin, valutë digjitale e inspiruar nga imazhet të tilla humoristike në internet, është ngritur menjëherë në qiell. Musk ka ndikuar në vlerën e kriptovalutave edhe në të kaluarën, përmes komenteve që ka bërë në rrjetet sociale, mirëpo tani nuk dihet qëllimi i tij i saktë. "Kekius" duket se është latinizim i fjalës “kek” që nënkupton “qeshje me zë të lartë”, e cila është e popullarizuar mes adhuruesve të lojrave online. "Kek" është edhe emri i zotit egjiptian të errësirës, që shpesh përshkruhet me kokë bretkose. Në profilin e ri të Muskut në X, Bretkosa Pepe është e veshur me rroba ushtarake dhe mban në dorë atë që duket si një tastierë lojërash.