Avionët F-35 Lightning II, të Lockheed Martin, nuk janë të pamësuar me kritikat, me disa ligjvënës amerikanë dhe mbikëqyrës të qeverisë që vënë në pikëpyetje koston e tij, ndërsa të tjerë kanë sugjeruar se i është kushtuar shumë vëmendje një avioni të vetëm. Tani, avioni luftarak i gjeneratës së pestë, është vënë sërish në qendër të vëmendjes. Sipërmarrësi i teknologjisë Elon Musk bëri një seri postimesh në platformën X, ku ai krahasonte kapacitetet e avionit me sistemet ajrore pa pilot. Gjithcka nisi me Musk që postoi një video të dronëve kinezë, nën të cilën shkruante...”Avionët luftarakë me pilot janë gjithsesi të vjetëruar në epokën e dronëve. Thjesht vrasin pilotët”, tha shefi i SpaceX, Tesla dhe X, në një postim në platformën e tij të mediave sociale. “Ndërkohë disa idiotë janë ende duke ndërtuar avionë luftarakë me pilot, si F-35at”, shtoi ai. Adhuruesit e avionëve, reaguan shpejt, duke nxjerrë në pah aftësitë e avionit e duke vënë në dukje se kina ka bërë përpjekje të mëdha për të kopjuar F-35ën. Sidoqoftë, konflikti në ukrainë ka treguar se dronët mund të jenë armë shumë efikase antitank dhe se ata mund të jenë shumë të saktë në shënjestrimin e infrastrukturës civile, goditjen e anijeve luftarake dhe aseteve të tjera. Musk, në këtë mënyrë mund të ketë të drejtë kur thotë se dronët janë e ardhmja, por ende nuk kemi mbërritur atje. F-35 Joint Strike aktualisht prodhohet në tre variante dhe përdoret nga Forcat Ajrore të Shteteve të Bashkuara, Marina e Shteteve të Bashkuara dhe Korpusi i Marinës së Shteteve të Bashkuara, ndërsa është shumë i kërkuar edhe nga aleatët e SHBA-së dhe vendet partnere në mbarë botën. Në postimin e tij në X, Musk nuk tha se si dronët e thjeshtë mund ta zëvendësonin atë.