25 vite burg kërkon prokuroria e Beratit për Byniamin Hajro, 61 vjecari që vrau, torturoi dhe dogji për së gjalli dy të rinj në vitin 1997 në qytetin e Beratit. Për Harjon, nisi sërish gjykimi nga Gjykata e rrethit gjyqsor Berat, e cila tashmë pritet të marrë vendimin mbi pretencën e dhënë nga organi i akuzës. Prokuroria kërkon nga gjykata të deklarojë fajtor 61 vjecarin për kryerjen e veprës penale “Vrasja me paramendim”, e kryer në bashkëpunim si dhe ta dënojë atë me 25 vite burg. Ky i fundit në bashkëpunim me disa persona të tjerë, rrëmbyen Arjan Avdullain dhe Eduart Pemën, i torturuan me sende të forta e më pas i dogjën me benzinë në një garazh. Pas këtij akti makabër, anëtarët e bandës Vakëf, i tërhoqen zvarrë viktimat me makinë në qytetin e Beratit. Prova më e fortë që arriti të siguronte organi hetimor ishte dëshmia e Ronaldo Pemës, vëllait të Eduart Pemës që mbeti viktimë. Ronaldo ka qenë me të në momentin që autorët nën kërcënimin e armës e detyruan atë të hipte në automjet për ta cuar më pas te vendi i keqtrajtimit. Pema tregoi për prokuroinë të gjitha detajet se si 4 persona keqtrajtuan në mënyrë cnjerëzojë dy të rinj. Byniamian Hajro u ekstradua nga Gjermania në vendin tonë pas 21 vitesh në kërkim nga autoritetet, ndërsa ishte në listën personave më të kërkuar në qytetin e Beratit.