Rikthehen ngjarjet e rënda në Elbasan. Mesnatën e së hënës një makinë, në pronësi të një biznesmeni, por që ishte edhe në listën e OFL për të plotësuar formularin e pasurisë, është djegur. Bëhet fjalë për shtetasin Elis Bahushi, makina e të cilit u dogj, ndërsa policia po heton, duke marrë të dhëna nga kamerat që ndodhen pranë vendit të ngjarjes. Elis Bahushi, rezulton i arrestuar në vitin 2018, pasi nga përgjimet telefonike rezultonte i lidhur me grupin Avdylaj nga Shijaku. Elis Bahushi është tregtar i metrazheve dhe një prej biznesmenëve të njohur në Elbasan, pronar i një kompleksi gjigant bar dhe restorant në lagjen "28 nëntori" dhe i disa dyqaneve në lagjen "Hekurudha". Gjithashtu, ai rezulton pronar edhe i disa makinave luksoze. Biznesmeni ka qenë dhe subjekt i OFL-së ku më 18 gusht të këtij viti i është dërguar formulari i deklarimit të pasurisë. Ai duhet të deklaronte pasurinë pasi ka qenë i dënuar për veprat penale "Prodhimi dhe shitja e narkotikëve" dhe “Pastrimi i produkteve të veprës penale”.