Kanali i Panamasë do të kufizojë numrin e anijeve që kalojnë nëpër rrugën ujore vendimtare nga kjo e premte, për herë të dytë, për shkak të thatësirës së shkaktuar nga fenomeni klimatik El Niño. Pesë përqind e tregtisë globale kalon nëpër kanalin që lidh Oqeanin Paqësor me Atlantikun. Rruga ujore do të zvogëlojë trafikun ditor nga 36 në 32 anije në ditë në një përpjekje për të kursyer ujë mes një thatësire të rëndë që ka të ngjarë të zgjasë deri në mesin e vitit 2027. Autoritetet e kanalit po zvogëlojnë gjithashtu thellësinë e lejuar të anijeve nga 15.24 në 14.63 metra. Panamaja ka shpallur gjendjen e emergjencës për shkak të El Niños, i cili rrit temperaturat sipërfaqësore në Oqeanin Paqësor dhe shkakton ndryshimin e drejtimit të erërave dhe sasisë së reshjeve, si edhe sjell dhe kushte të çrregullta të motit. Kanali 80 kilometra i gjatë mbështetet te uji i ëmbël që vjen kryesisht nga reshjet dhe ruhet në liqene artificiale. Pa ujë, trampolinat e tij që ngrenë dhe ulin anijet në fillim dhe në fund të udhëtimit nuk do të funksiononin. Çdo anije tranziti kërkon rreth 200 milionë litra ujë, që më pas shkarkohet në det.