Arrestimi i vrasësve jo domosdoshmërisht nënkupton se krimi është zbuluar. Ligjërisht duhet të ketë edhe prova që të mund të mbahet në këmbë akuza e ngritur, prova jo vetëm shkresore e shkencore, por edhe dëshmi. Në rastin e ekzekutimit të biznesmenit Behar Sofia, për Policinë pamjet e kamerave bënë të mundur zbulimin e autorëve, por nga ana tjetër që akuza të provohej, duhej që të kishte edhe një dëshmi, që në këtë rast vjen nga autori Ernejt Shyti. Ky i fundit ka pranuar të jetë dëshmitar i Drejtësisë, prej nga mund të fitojë jo vetëm lëhtësira në dënim, por nga ana tjetër edhe benifite që i parashikon ligji. Kësisoj, zbardhja e ngjarjeve kriminale nëpërmjet dëshmitarëve dhe bashkëpunëtorëve të Drejtësisë, përveç goditjes se autorëve shoqërohet edhe me një kosto të lartë financiare për shtetin. Programi për mbrojtjen e dëshmitarëve parashikon jo vetëm garantimin e jetës së personit dhe familjes së tij, por edhe strehimin, trajtimin financiar, mjekësor, arsimimin e deri te trajtimi psikologjik. Pavarësisht kësaj kostoje, ky program është vlerësuar si i suksesshëm duke garantuar vazhdimësinë dhe zgjerimin e tij. Agjentë të zyrës kujdesen për të gjetur një banesë në një qytet tjetër, ku akomodohet personi që ka fituar trajtimin e posaçëm, së bashku me familjen e tij.