Gjykata e Tiranës ka caktuar masën e sigurisë “arrest në burg” për 74 vjeçarin Hekuran Gjoni, i cili vrau me thikë djalin e tij Agim Gjoni. Ngjarja u shënua tek Kodra e Priftit në rrugën Ilia Shyti në Tiranë, brenda banesës ku jetonte familja e tyre. 37 vjeçari Agim Gjoni u dërgua në spital, por nuk mundi t’i mbijetonte plagëve, ku për pasojë ndërroi jetë. Një ditë pas ngjarjes, policia e Tiranës arrestoi autorin dhe e referoi ngjarjen në prokurori për kryerjen e veprës penale “Vrasje për shkak të marrëdhënieve familjare”. Sipas dëshmisë së autorit, krimi i rëndë në familje erdhi pas një sherri banal. Pak pas ngjarjes autori pranoi krimin përpara policisë, duke thënë se djali e bullizonte, për këtë arsye e vrau me thikë. Sipas tij, teksa po darkonin mbrëmjen kur ndodhi vrasja, djali nisi ta tallte dhe se aty ka nisur debate mes tyre që degradoi deri në përplasje fizike. Bëhet me dije se viktima ishte i martuar dhe ishte baba i dy fëmijëve.