Irani ka ekzekutuar një numër “tronditës” prej 2.159 personash më 2025, thuhet në raportin e Amnesty International të publikuar të hënën. Sipas organizatës për të drejtat e njeriut, numri i ekzekutimeve ka tejkaluar rekordin e vitit 1981 të regjistruar në këtë vend. Amnesty International tha se të paktën 2.707 persona u ekzekutuan në mbarë botën vitin e kaluar, edhe pse dënimet me vdekje të dhëna në Kinë nuk janë përfshirë në këtë shifër. Organizata me seli në Londër tha se “mijëra ekzekutime” janë kryer në Kinë, shtetin që përdor më së shumti dënimin me vdekje. Megjithatë, sipas Amnesty detajet janë të paqarta për shkak të “sekretit shtetëror” mbi të dhënat atje. Amnesty tha se shifra globale për vitin 2025, që përfshin ekzekutimet në Arabinë Saudite, Kuvajt, Egjipt, Jemen, Singapor dhe Shtetet e Bashkuara, paraqet rritje për më shumë se dy të tretat krahasuar me shifrën e përgjithshme më 2024. “Ky trend ishte më i theksuar në shtetet ku autoritetet kanë forcuar kontrollin mbi pushtetin, duke kufizuar hapësirën civile, duke heshtur disidencën dhe duke treguar shpërfillje ndaj mbrojtjeve të vendosura nga ligjet dhe standardet ndërkombëtare për të drejtat e njeriut”, u tha në deklaratë.