Është ekzekutuar me një breshëri plumbash në banesën e tij, ish-polici i burgjeve, Gentian Bejtja. Ngjarja ka ndodhur këtë të premte në zonën e Niklës në Krujë. Ai është qëlluar me breshëri kallashnikovi në banesën e vet në fshatin Larushk, ndërsa pak kilometra larg vendngjarjes është gjetur duke u djegur një automjet, që dyshohet se është përdorur nga autorët. Policia ka mbërritur në vendin e ngjarjes, ku janë gjetur një numër i madh gëzhojash. Dyshohet se në atentat kanë marrë pjesë të paktën dy persona. Ky ishte atentati i katërt ndaj 44-vjeçarit Gentian Bejtja. Në 2016-n atij i vendosën një sasi tritoli në automjet. Nga shpërthimi ai u plagos, por u mbijetoi plagëve. Më 9 janar 2022 Bejtja i shpëtoi një atentati me kallashnikov, po në zonën e Niklës. Në atë rast, Bejtja u plagos lehtë në krah. Ai shoqërohej nga 31-vjeçari, Klodian Stafuka, që ndodhej në të njëjtën makinë me të. Atentati në atë kohë ndodhi në një pikë karburanti, ku kishin ndaluar për të furnizuar mjetin.