Garda Revolucionare e Iranit tha se Ismail Haniyeh, lideri politik i Hamasit është vrarë gjatë një sulmi në Teheran, duke fajësuar Izraelin. Garda tha se po heton sulmin që la të vrarë Haniyeh, 62 vjeç, ndërsa ai ishte në Teheran për të marrë pjesë në ceremoninë e inaugurimit të presidentit të ri të Iranit, Masud Pezeshkian. Garda Revolucionare e Republikës Islamike nuk dha detaje se si u krye sulmi. Hamasi, që mbështetet nga Irani, konfirmoi lajmin përmes një postimi në Telegram, duke thënë se Haniyeh u vra “në një sulm ajror në rezidencën e tij në Teheran”. Edhe presidenti i ri i Iranit, Masud Pezeshkian, njoftoi përmes X për vrasjen e Haniyeh. “Republika Islamike e Iranit do të mbrojë integritetin e saj territorial, nderin dhe do të bëjë që pushtuesit terrorist të paguajnë për veprimet e tyre”, shkroi ai. Në anën tjetër, pala izraelite ende nuk ka konfirmuar vdekjen e liderit politik të Hamasit. “Ismail Haniyeh, i cili erdhi në Iran për ceremoninë e inaugurimit të presidentit dhe po qëndronte në një rezidencë të posaçme për veteranët në veri të Teheranit është vrarë me një predhë nga ajri”, shkroi në X Fars, agjencia e lajmeve e lidhur me Gardën Revolucionare Islamike. Presidenti i Autoritetit Palestinez, Mahmud Abbad, menjëherë dënoi vrasjen, duke e cilësuar “akt qyqar dhe zhvillim të rrezikshëm”. Disa shtete kanë dënuar sulmin. Rusia e ka quajtur “vrasje të papranueshme politike”, ndërkaq Turqia ka paralajmëruar se vrasja e liderit politik të Hamasit do të zgjasë luftën mes Izraelit dhe Hamasit në Rripin e Gazës. Kur u pyet për sulmin që vrau Haniyeh, sekretari amerikan i Mbrojtjes, Lloyd Austin, u tha gazetarëve në Filipine se “nuk kishte informacione shtesë për t’iu dhënë”. Izraeli është zotuar se do të vrasë udhëheqësit e Hamasit për shkak të sulmit që grupi radikal palestinez kreu brenda territorit izraelit më 7 tetor. Haniyeh ka qenë pjesë e Hamasit për dekada të tëra dhe u bë shef politik i grupit më 2017. Ai ka jetuar në Rripin e Gazës deri më 2019 dhe më pas në mërgim në Katar. Gjatë luftës mes Izraelit dhe Hamasit në Gazë, Haniyeh ka udhëtuar nëpër shtetet e Lindjes së Mesme ku ka marrë pjesë në negociatat ndërkombëtare për konfliktin, përfshirë edhe në negociatat për lirimin e pengjeve që ende mbahen nga Hamasi.