Tre policë izraelitë u vranë pasi makina e tyre u sulmua me armë zjarri afër qytetit Hebron, në Bregun e pushtuar Perëndimor, thanë autoritetet që konfirmuan sulmin ndërsa theksuan se janë në kërkim të autorëve. Qindra trupa izraelite, sipas Radio Europa e Lirë, po kryejnë bastisje në mbarë Bregun Perëndimor që nga e mërkura në një prej aksioneve më të mëdha në muaj në këtë zonë, duke thënë se synimi i operacionit është çrrënjosja e militantëve islamikë. Ndërkohë ndërkombëtarët i kanë bërë thirrje Izraelit që të ndalë operacionin në Bregun perëndimor. “Ne po luftojmë në të gjitha frontet kundër një armiku mizor që dëshiron të na vras të gjithë ne”, tha kryeministri izraelit Benjamin Netanyahu i cili u përball dhe me kritika pasi ministri i Financave kërkoi më shumë veprime kundër militantëve palestinezë. Dhuna në Bregun Perëndimro është rritur që kur ka nisur lufta në Gazë më 7 tetor mes Izraelit dhe Hamasit, grupit palestinez të shpallur organizatë terroriste nga Shtetet e Bashkuara dhe Bashkimi Evropian. Izraeli ka pushtuar Bregun Perëndimor, së bashku me Gazën dhe Jerusalemin Lindor gjatë Luftës të Lindjes së Mesme më 1967. Palestinezët duan që këto tri territore të jenë pjesë e shtetit të tyre në të ardhmen.