Dy gjyqtarë u vranë në një sulm me armë zjarri të shtunën në ndërtesën e Gjykatës së Lartë në Teheran, njoftoi media shtetërore. "Sot në mëngjes, një person i armatosur hyri në Gjykatën e Lartë, në një akt të paramenduar të vrasjes së dy gjyqtarëve me përvojë. Dy gjyqtarët humbën jetën", njoftuan zyrtarët. Sipas tyre sulmuesi "vrau veten" pas të shtënave. Agjencia shtetërore e lajmeve IRNA raportoi gjithashtu se një person tjetër u plagos në sulm. Zyrtarët i identifikuan dy gjyqtarët e vrarë si Ali Razini dhe Mohammad Moghisseh, duke shtuar se ata punonin në rastet e "luftimit të krimeve kundër sigurisë kombëtare, spiunazhit dhe terrorizmit". Një zëdhënës i gjyqësorit tha në televizionin shtetëror më vonë të shtunën se një person i armatosur me pistoletë hyri në sallën ku ndodheshin dy gjyqtarët dhe i qëlloi ata. Motivi i vrasjes nuk ishte menjëherë i qartë, por zyrtarët thanë se sulmuesi nuk ishte i përfshirë në asnjë çështje përpara Gjykatës së Lartë, pa dhënë detaje të mëtejshme mbi identitetin e sulmuesit. Autoritetet thanë se një hetim për incidentin ka nisur. Një nga gjyqtarët e vrarë, u sanksionua në vitin 2019 nga SHBA për shkak të mbikqyrjes së cështjeve të shumta, të padrejta, gjatë të cilave akuzat kanë rezultuar të pabaza dhe provat janë shpërfillur. Ndërsa tjetri ka mbajtur disa poste të rëndësishme në gjyqësorin e iranit dhe kishte qenë edhe një herë tjetër në shënjestër të një atentati, në vitin 1998.