Një atentat mafioz tronditi Vlorën mbrëmjen e 7 janarit, duke lënë të vdekur në vend të birin 23-vjeçar të ish-anëtarit të bandës së Gaxhait, Sokol Sinomataj. I kthyer pak ditë më parë nga Belgjika për të festuar festat e fundvitit, 23-vjeçari Gëzim Sinomataj u qëllua me snajper nga persona ende të paidentifikuar, në ballkonin e shtëpisë së tij. Një nga pistat e hetimit për vrasjen është hakmarrja, pasi Sokol Sinomataj, i njohur me nofkën 'buzëderri' është arrestuar për vrasjen e Elton Tatos dhe plagosjen e një tjetri në vitin 2002. Ai u arratis nga burgu i Peqinit në vitin 2017, pasi kishte marrë leje dhe nuk u kthye më. Shpallja e tij në kërkim me kartele jeshile rezulton të jetë kryer në datë 12 shtator 2017. Menjëherë, sapo doli nga burgu, ai mori të vëllain Bernardin dhe djalin adoleshent asokohe dhe u largua nga Shqipëria. Dyshohet se u vendosën në Belgjikë.